Nogironligi bo'lgan shaxslarni qo'llab-quvvatlash siyosati

Nogironligi bo'lgan shaxslarni qo'llab-quvvatlash siyosati

O'zbekiston Respublikasi Prezidentining 2019-yil 29-apreldagi PF-5712-son Farmoni hamda 2020-2025-yillarda inklyuziv ta'limni rivojlantirish konsepsiyasiga muvofiq, Qarshi davlat universitetida alohida ta'lim ehtiyojlariga ega bo'lgan talabalar uchun teng, qulay va sifatli ta'lim muhitini yaratish ustuvor vazifa etib belgilanadi.

Mazkur siyosat nogironligi bo'lgan talabalar, xodimlar va tashrif buyuruvchilar uchun teng imkoniyatlar yaratish, ularning ta'lim, mehnat va ijtimoiy hayotda to'liq va samarali ishtirokini ta'minlashga qaratilgan. Siyosat inklyuzivlik, kamsitmaslik, individual yondashuv, maxfiylik va barqarorlik tamoyillariga asoslanadi hamda Barqaror rivojlanish maqsadlari bilan uyg'un holda amalga oshiriladi.

Qo'llash sohasi va majburiy hollari

Siyosat barcha ta'lim bosqichlari talabalari, akademik va ma'muriy xodimlar, tashrif buyuruvchilar hamda hamkor tashkilot vakillariga tatbiq etiladi. U ta'lim jarayoni, ish faoliyati, tadbirlar va infratuzilma xizmatlarini qamrab oladi va quyidagi holatlarda majburiy hisoblanadi:

• ma'ruza, seminar va imtihonlar kabi ta'lim jarayonlarida;
• ishga qabul qilish va mehnat faoliyatida;
• tadbirlar va jamoat faoliyatida;
• infratuzilma va xizmatlardan foydalanishda.

Asosiy tamoyillar

• har bir shaxs uchun teng huquq va imkoniyatlar;
• to'g'ridan-to'g'ri yoki bilvosita diskriminatsiyani qat'iy rad etish;
• individual ehtiyojlarni alohida baholash va moslashtirilgan qo'llab-quvvatlash;
• nogironlikka oid ma'lumotlarning maxfiyligi;
• qo'llab-quvvatlash xizmatlarini doimiy rivojlantirish.

Qo'llab-quvvatlash xizmatlari

Akademik qo'llab-quvvatlash doirasida individual o'quv rejalarini ishlab chiqish, o'quv materiallarini braille, audio va raqamli shakllarda taqdim etish, imtihonlarda qo'shimcha vaqt ajratish, alohida sharoit yaratish va moslashtirilgan baholash tizimlarini joriy etish ko'zda tutiladi. O'qituvchilar uchun inkluziv pedagogika bo'yicha treninglar muntazam o'tkaziladi.

Jismoniy muhitni moslashtirish doirasida panduslar, liftlar, keng kirish yo'laklari, maxsus hojatxonalar, taktil yo'laklar hamda vizual va audio belgilar joriy etiladi. Texnologik qo'llab-quvvatlash screen reader, speech-to-text va text-to-speech vositalarini, shuningdek, onlayn ta'lim platformalarini xalqaro accessibility standartlariga moslashtirishni o'z ichiga oladi. Kutubxonalarda maxsus texnika va raqamli resurslar kengaytiriladi.

Psixologik va ijtimoiy yordam xizmatlari professional maslahat, stressni boshqarish, yangi muhitga moslashish dasturlari, tengdoshlar o'rtasida o'zaro yordam tizimlari va inklyuziv madaniyatni shakllantirishga qaratilgan ma'naviy-ma'rifiy tadbirlarni o'z ichiga oladi.

Inkluziv qo'llab-quvvatlash markazi

Universitetda tashkil etilgan "Inkluziv qo'llab-quvvatlash markazi" quyidagilar uchun mas'ul:

• talablarni aniqlash;
• xizmatlarni tashkil etish;
• monitoring olib borish;
• har bir fakultet va bo'limning siyosatga amal qilishini ta'minlash;
• o'qituvchilar tomonidan inkluziv yondashuv qo'llanilishini kuzatish.

Monitoring va baholash

Siyosatning samarali ijrosi yillik auditlar va hisobotlar, talaba va xodimlar fikr-mulohazalari, KPI hamda SDG indikatorlari asosida baholanadi. Natijalar doimiy takomillashtirish rejasiga kiritilib boriladi.

Moliyalashtirish

Moliyalashtirish universitetning ichki budjeti, davlat dasturlari, xalqaro grantlar, xususiy sektor hamda donor tashkilotlar bilan hamkorlik orqali shakllantiriladi. Bu yondashuv infratuzilmani moslashtirish, assistiv texnologiyalarni xarid qilish, mutaxassislarni tayyorlash va qo'llab-quvvatlash xizmatlarini barqaror saqlashga xizmat qiladi.